Një emigrant nga Maroku është gjetur thuajse i ngrirë në oborrin e një xhamie në fshatin Dragostrunjë të Librazhdit.
Mësohet se 22-vjeçari nga Maroku është gjetur mesditën e sotme nga Hoxha i fshatit Dragostrunjë dhe ishte në gjendje kritike për jetën.
Sipas “BalkanWeb”, policia ka konstatuar se personi që u gjet i ngrirë dhe i shtrirë në oborrin e xhamisë është shtetasi Selim Muhamed Idriz.
Ai është transportuar në një spital në Librazhd ku pas dy orësh 22-vjeçari është përmendur.
Ai ka arritur të komunikojë me bluzat e bardha por edhe me efektivët e policisë të cilëve iu ka deklaruar se kishte udhëtuar katër ditë maleve nëpër dëborë nga Maqedonia drejt Shqipërisë.
Mësohet se gjendja e tij shëndetësore është vlerësuar e rënduar pasi këmbët e tij kanë pësuar djegie të plotë nga i ftohti i acartë.
Bëhet e ditur se rreth orës 15:30 i riu maroken është transportuar drejt Repartit të Djegieve në Tiranë, për të marrë një ndihmë më të specializuar mjekësore./Opinion.al
