Deputetët që duan të hyjnë në ambientet e burgjeve për të takuar persona të dënuar apo të paraburgosur, duhet të marrin më parë miratimin e Ministrit të Drejtësisë, Ylli Manjani. Ky urdhër i firmosur nga drejtori i Përgjithshëm të Burgjeve, Miklovan Kopani, u është drejtuar vartësve të tij, që të mos lejojnë asnjë deputet apo funksionar të lartë që të kryejnë vizita apo takime në burgje.
News 24 publikoi një kopje të këtij urdhri që vjen vetëm pak ditë pasi Spartak Braho hyri në burg për të takuar një të dënuar. Ishte gazetari Artan Hoxha që publikoi fillimisht lajmin. Sipas Hoxhës një deputet kishte hyre për të takuar Dritan Dajtin. Edhe pse Hoxha nuk e publikoi emrin e deputetit, ishte media e shkruar që shkoi më tej duke zbuluar se bëhej fjalë për Spartak Brahon. Por Drejtoria e Burgjeve mohon se kreu i komisionit të Sigurisë ka takuar Dritan Dajtin, sipas tyre ai ka takuar Iliaz Labin, ish-zv.drejtorin e Burgjeve, i cili ndodhet në paraburgim.
Kjo me sa duket vuri në siklet Manjanin që nxorri shkresën e publikuar nga News 24 si më poshtë:
“Nuk do të lejohen të kryejnë vizita e takime deputetët e Kuvendit të Shqipërisë dhe funksionarë të lartë publikë, pa paraqitur më parë arsyen dhe qëllimin e vizitës te Ministri i Drejtësisë për miratim. Pas miratimit, drejtoria e Përgjithshme e Burgjeve do të krijojë kushtet e nevojshme me qëllim zhvillimin e takimeve”.
