Analisti Preç Zogaj nëpërmjet një shkrimi të gjatë në gazetën ‘Panorama’, me titull: ‘Nevoja për një pakt lirie dhe përgjegjësie në PD’, ndër të tjera shkruan se ka deputetë të PD-së, që nuk janë votuar që nga viti 2005 dhe kanë humbur përgjatë kohës ato lidhjet speciale me zgjedhësit, që i dikton sistemi maxhoritar.
Më tej, Zogaj thekson se një pjesë e forumeve dhe hierarkive politike të PD-së janë ngritur përgjithësisht mbi këtë mekanizëm informal dhe sipas tij, edhe pervers, që shtrihet në gjithë sistemin politik.
“Deputetët e pavotuar me votë të drejtpërdrejtë janë automatikisht anëtarë të pavotuar të këshillit kombëtar; mjaft prej tyre janë anëtarë të Kryesisë për shkak të detyrave që kanë në komisionet parlamentare si deputetë të zgjedhur pa votë të drejtpërdrejtë”, shkruan ai.
Sipas tij, karriera dhe funksione që nuk takohen gjëkundi me votën e lirë! Ndërkaq, Zogaj, pyet: “Si mund të matet në këto kushte performanca, pesha, popullariteti dhe fuqia e tyre reale?”
Ai thekson se Lulzim Basha ka thënë dhe po thotë në turin e tij të ditëve të fundit se është në kërkim të një mekanizmi që do të fuqizojë anëtarësinë në zgjedhjen e kandidatëve. Se cili është ky mekanizëm, nuk dihet ende. Kjo është një çështje e madhe që do të përcaktojë shumë në rezultatin e PD-së në zgjedhje.
