Deputetja e Partisë Demokratike, Flutura Açka, në nisje të seancës plenare të ditës së sotme, foli për projektligjin e qeverisë, për studentët e mjekësisë, të cilët do të marrin diplomën pasi të kenë punuar pesë vite në Shqipëri.
Açka e konsideron masë ekstreme dhe shkelje të të drejtave të njeriut këtë projektligj.
Deputetja tha se duhet konsultim më i gjerë publik për këtë çështje dhe jo të kalojë për miratim me procedurë të përshpejtuar.
“Sigurisht që duhen marrë masa që djemtë tanë të mos na ikin, por para se ta bëjmë këtë, ne duhet ta bëjmë Shqipërinë të dëshirueshme para se të kalojmë në masa ekstreme. Në sytë e mi kjo është një masë shumë eksteme dhe nxitimi juaj është i papërshtatshëm pasi ka shumë arsye që ju nuk keni pse të nxitoheni, aq më shumë të përfshini edhe këtë kontigjent që sapo hyn në këtë masën tuaj drastike. Nuk është konsultuar ky pr/ligj me grupet e interesit që janë vetë studentët, as konsultim publik të gjerë nuk është bërë. Kështu që nuk e shoh të arsyeshme që të përshpejtohet dhe të vijë në parlament me kaq nxitim. Gjëja e parë që ndodh është shkelja e të drejtave të njeriut dhe është e papranueshme që ne të vendosim me dhunë pa i bindur dhe pa krijuar mjedisin e këndshëm, mundësinë për t’i sqaruar njerëzit që përse i marrim këto masa. Sepse jam e sigurt që studentët do të protestojnë. Edhe unë jam për të marrë masa që fëmijët të mos na ikin, por jo këto forma absurde të cilat i kemi harruar”-tha Flutura Açka.
