Ministrja e Shëndetësisë, Albana Koçiu tha pas mbledhjes së qeverisë se ligji për shëndetin seksual dhe riprodhues do t’i nënshtrohet konsultimve.
Në një komunikim me gazetarët ajo ftoi, të gjitha grupet e interesit që të japin sugjerimet e tyre te vlefshme për të pasur një ligj sipas standardeve ndërkombëtare.
“Kemi disa ditë që ne kemi hedhur në platformën e konsultimit publik sa i përket një akti ligjor të rëndësishëm që është ai i shëndetit seksual dhe riprodhues.
Është një akt ligjor që vjen në vazhdën e politikave shëndetësore dhe sociale sa i përket përmirësimit të mënyrës si i qasemi shëndetit seksual, sidomos tek të rinjtë, por edhe të rregullojmë shëndetin riprodhues.
Është një ligj rregullator që do ti nënshtrohet konsultimit publik për periudhën e parashikuar. Ne ftojmë grupet e interesit, organizatat e shoqërisë civile, ekspertët e shëndetësisë, që nëse kanë sugjerime apo mendime të vlefshme për të kontribuar në rregullimin e këtij sektori të rëndësishëm janë të ftuar ta bëjnë atë. Të sjellim një kuadër rregullator bashkohor sipas standardeve ndërkombëtare”, tha ministrja.
