Pogba 1-2-0. Jo, nuk është vlera e tij në merkato, në milionë euro, që Reali i Zizou dhe të tjerë klube janë të gatshëm t’i ofrojnë Juventusit, për yllin më ndritshëm në ekip. Këtu bëhet fjalë për tre votat më të shpeshta të dhëna nga tifozët francezë për Paul Pogba gjatë ndeshjes çelëse të Kampionatit Europian, për blutë.
Mbrëmë, para sfidës Francë-Rumani, sytë e të gjithë botës ishin përqendruar te Paul, ndaj dhe “L‘Equipe” i kishte dedikuar faqen e parë me titullin “Të ribësh historinë”. Por, ai ka dështuar në provën e parë: asgjë për të regjistruar për gjatë të gjithë aktivizimit, deri kur trajneri Deschamps e zëvendësoi me Martial. Para fillimit të ndeshjes e përditshmja franceze ka ftuar tifozët e kombëtares franceze në Tëitter, për të votuar mbi atë që do të ishte performanca e Pogbasë. Një sondazh që rezultoi me një lum notash negative.
Fillon nga zero, e shoqëruar me një “inekzistent”, për të vijuar me 1 dhe 2. Këto ishin notat e akorduara nga publiku për paraqitjen e Pogba, në ndeshjen ndaj Rumanisë. Por, përtej notave, mëria e tifozëve është shfrenuar në komentet dhe gjykimet: “Pogba nuk e meriton besimin që i është dhënë, duhej të ishte zëvendësuar që më parë”; “E vlerësoj me 3, madje kaq e ka shumë”; “1 për paraqitjen”; “Reali e vlerëson 120 milonë euro e më shumë? Unë e vlerësoj pak a shumë 120 euro”.
Tifozë shumë të këqinj? Me siguri po, pasi pasioni për kombëtaren e tyre dhe frika që mund ta mbyllnin ndeshjen me vetëm një pikë, ka ndikuar në gjykim. Nga ana tjetër vlerësimi i mesfushorit të bardhezinjve nuk mundet të vuloset me vetëm një ndeshje pa shkëlqim. Por, që Europiani i tij nuk ka nisur ashtu sikurse të gjithë e prisnin, kjo është e padiskutueshme. Pogba ka zhgënjyer edhe ekspertët e specialistët të cilët e kanë votuar dobët nëpër gazetat dhe mediat sportive europiane: “Gazzetta” nuk ka shkuar përtej notës 5,5, ndërkohë që vetë “L‘Equipe” i dha një notë kaluese të sforcuar, 5, aspak afër pritshmërive të yllit të Europianit.
