Ka shprehur publikisht mbështetjen për Ben Blushin, por ka përfunduar i dhunuar nga garda e Republikës dhe policia e Korçës. 53-vjecari Niko Dinko, rreth orës 14:00, teksa ka parë kryeministrin Rama, i cili ndodhet sot në Korçë, që po shkonte drejt Muzeut të Artit Mesjetar, është afruar dhe ka hedhur parulla kundër qeverisjes së tij, duke shprehur mbështetje për Ben Blushin.
“Poshtë Rama! Rroftë Ben Blushi! Ben Blushi, intelektuali i Korces, do të ta hajë kokën ty”. Me këto fjalë i është drejtuar 53-vjeçari kryeministrit Rama, i cili sipas rrëfimit të tij, nuk ka reaguar.
Ndërsa kryeministri ka vijuar i qetë rrugën, përfaqësuesit e gardës dhe policia e Korçës, e kane marre forcërisht 53-vjeçarin dhe pasi e kanë dhunuar, e kane futur forcërisht në një mjet policie.
Dinko akuzon shefin e Rendit të Komisariatit të Korçës, Mariglen Jacellari, se e ka dhunuar dhe goditur pa asnjë shkak të ligjshëm.
53-vjeçari, i cili dikur ka qenë punonjës policie, është mbajtur për gati 15 minuta në makinën e policisë dhe më pas është lënë i lirë.
Pas ngjarjes, 53-vjeçari është drejtuar për në spitalin e Korçës, ku i është nënshtruar disa kontrolleve të ekspertëve mjeko-ligjorë.
Dinko e konsideron dhunën e ushtruar nga policia të pajustifikuar, ndërsa pohon se ka bërë denoncim për shpërdorim detyre për shefin e Rendit, Mariglen Jacellari.
53-vjecari Dinko, thotë se edhe në vitin 1996 ka qëlluar me vezë kryeministrin e asaj kohe Aleksandër Meksi, por as është dhunuar, dhe as është shoqëruar nga policia.
Burimi: BalkanWeb
