Është një mbrëmje e nxehtë nëntori në qytetin San Pedro Sula të Hondurasit. Dritaret e një kamioni të vogël për bartjen e njerëzve janë hapur deri në fund ndërsa zhurma e borive të veturave dhe tingujt e muzikës rege përzihen me jehonën e motorëve.
Përkundër gjithë kësaj zhurme dëgjohet gjithandej zëri i një burri trupmadh, në fund të të 20ave. Trupi i tij i madh mbulon gjithë ulësen e shoferit të këtij kamioni, telefonin e ka të ngjitur në vesh dhe nuk po i pëlqen aspak ajo që po dëgjon, shkruan “AlJazeera”, transmeton “Koha Ditore”. E derisa biseda vazhdon, zëri i tij bëhet gjithnjë e më i lartë, për të përfunduar në britma rrëqethëse. Ai është i shqetësuar. Në këto momente ai duhej ta kishte gati një grup të hondurianëve për udhëtimin më të rrezikshëm të jetëve të tyre, për të cilin secili e kishte paguar atë nga 7.000 dollarë. Mirëpo, një nga një klientët e tij të ardhshëm po refuzojnë t’u përgjigjen telefonatave të tij. Burri në fjalë është një trafikant qeniesh njerëzore, që në vendin e tij njihet përndryshe si “pollero”. Gjatë katër vjetëve të fundit ai e ka siguruar jetesën nga një biznes ilegal – duke i bartur njerëzit nga Amerika Qendrore, nëpërmjet Meksikës, përkundër autoriteteve të saj vigjilente të emigracionit dhe karteleve brutale, drejt Shteteve të Bashkuara të Amerikës.
