Politikani holandez anti-islamik, Geert Wilders, ka ngjallur sërish polemika pasi i është rikthyer planeve të tij për mbajtjen e një konkursi karikaturash tallëse për Profetin Muhamed.
Në një mesazh në Twitter, Wilders u bëri thirrje njerëzve të dërgojnë karikaturat e tyre të profetit.
“Liria e fjalës duhet të mbizotërojë mbi dhunën islamike,” shkroi lideri i partisë më të madhe opozitare në parlamentin holandez.
Wilders hoqi dorë nga një konkurs i ngjashëm gushtin e vitit të kaluar pasi policia arrestoi një burrë, që kishte kërcënuar ta vriste pikërisht për shkak të idesë së tij. Planet e tij për të zhvilluar konkursin nxitën asokohe demonstrata të mëdha në Pakistan, të organizuara nga partia islamike Tehreek-e-Labbaik, e cila u bëri thirrje vendeve islamike që të ndërpresin cdo lodhje me Holandën.
Kujtojmë se në vitin 2005, gazeta daneze Jyllands-Posten publikoi karikaturat e profetit Muhamed, dhe kjo shkaktoi një valë masive demonstratash të dhunshme në të gjithë botën muslimane, si dhe disa përpjekje për të vrarë redaktorin e saj apo karikaturistin, Kurt Westergaard.
Dhjetë vjet më vonë, në Paris, disa islamikë të armatosur vranë brenda zyrave të tyre 12 punonjës të revistës Charlie Hebdo, e cila njihej gjithashtu për botimin e karikaturave satirike të Muhamedit./Opinion.al
