Prestigjiozja gjermane, “Bild”, ka bërë një shkrim përmbledhës ditën e sotme, që e titullon “8 klube, 18 tregime nga Bundesliga”. Veç konfirmimit të largimit nga stoli i Bayern Munich të Pep Guardiolës në fund të sezonit, ardhjes në vend të tij të Carlo Ancelottit, situatës së Goetze te bavarezët, etj. etj, ky gjigand i medias së shkruar në Gjermani ka përfshirë edhe një të veçantë tepër interesante.
Ajo lidhet me emrin e lojtarit shqiptar (nga Gostivari i Maqedonisë), i cili luan me Bayer Leverkusen, në Bundesliga, dhe është pjesë e kombëtares së Zvicrës, me të cilën kuqezinjtë tanë do të përballen më 11 qershor në fazën finale të “Euro 2016”. “Mehmedi flet shtatë gjuhë.
Pas karrierës së tij si sulmues, ai mund të punojë fare mirë si përkthyes. 24-vjeçari i Leverkusen, Admir Mehmedi, është gjeniu më i madh gjuhësor i Bundesligës. Përfaqësuesi i kombëtares së Zvicrës dominon kolegët e tij, me shtatë gjuhë: shqip, “schwyzerdütsch”, italisht, rusisht, frëngjisht, anglisht dhe gjermanisht,” – shkruan “Bild”./ Telesport
