Gjykata për Krime të Rënda nisi shqyrtimin gjyqësor për çështjen e përplasjes së makinës së policisë pranë tregut agro-ushqimor në qytetin e Elbasanit në vitin 2017.
Pas disa seancash të dështuara, Prokuroria lexoi këtë të enjte kërkesën për gjykim, ndërsa në seancën e radhës pritet të dëshmojnë 4 punonjës policie që ishin dëshmitarë në vendin e ngjarjes, përfshirë edhe Gjergji Oshafin.
Seanca gjyqësore u shoqërua me debat sa i përket kualifikimit të veprës penale, por në zbatim të vendimit të seancës paraprake tre të pandehurit do të gjykohen për “vrasje ndaj punonjësit të policisë”, mbetur në tentativë.
Të pandehur në proces Kelmend Xhaferri që ndodhet në burg , Enea Bekteshi me masën e sigurisë “arrest shtëpie” dhe Suel Cela është në kërkim pasi Gjykata e Krimeve të Rënda ka dhënë masën “arrest me burg” në mungesë./Opinion.al
