Policia e Korçës ka kapur në flagrancë dhe ka arrestuar dy shtetas në qytetin e Korçës për shitblerje të votave. Mësohet se P.M, 55 vjeç si edhe R.D, 61 vjeç.
55 vjeçari, P.M, u kap teksa po shpërndante 200.000 lekë për të blerë votën për një parti politike, ndërsa R.D me detyrë koordinator është kapur duke shpërndarë 170.000 lekë për të paguar zgjedhësit dhe komisionerët e subjektit që ai koordinonte.
Njoftimi i Policisë
Arrestohet në flagrancë një shtetas, si edhe procedohet penalisht në gjendje të lirë një tjetër, për veprën penale:“Korrupsioni aktiv në zgjedhje”.
Specialistët e Sektorit kundër Krimit Ekonomik-Financiar në Drejtorinë Vendore të Policisë Korçë, bënë kapjen dhe arrestimin në flagrancë të shtetasit :
- Pajtim Myrtollari, 55 vjeç, banues në Korçë, (me detyrë specialist pranë Drejtorisë së Peshkimit Korçë, koordinator i një subjekti politik )
Arrestimi i tij u bë pasi më datë 25.06.2017 ky shtetas, është kapur duke shpërndarë shuma lekësh me qëllim blerjen e votës, deri në 200.000 lekë për një subjekt të caktuar politik.
Gjithashtu po nga këto struktura filloi procedimi penal në gjendje të lirë ndaj shtetasit:
- R.D, 61 vjeç, banues në Korçë (me detyrë koordinator i një subjekti politik)
Procedimi ndaj tij filloi pasi, më datë 25.06.2017, këtij shtetasi në lagjen nr 6 në Korçë, në automjetin e tij me targa AA240KI, i janë gjetur e sekuestruar në cilësinë e provës materiale një sasi prej 170.000 lekësh të cilat dyshohen se do përdoreshin për pagesat e zgjedhësve dhe komisionerëve të këtij subjekti.
Materialet në ngarkim të shtetasve të mësipërm i kaluan Prokurorisë lidhur me veprën penale: “Korrupsioni aktiv në zgjedhje” parashikuar nga neni 328 i Kodit Penal.
