Detaje të reja janë zbardhur lidhur me sekuestrimin e dy minave me telekomandë të programuara për shpërthim në distancë që do të përdoreshin nga dy vëllezër.
Policia bën me dije se minat u përkisnin vëllezërve Jesar Shabaj, 20 vjeç, banues në Tiranë e në Shkodër dhe Jaser Shabaj, 23 vjeç, banues në Postribë, Shkodër. Si rezultat i hetimeve, ka rënë në pranga 20-vjeçari,. ndërsa vëllai tjetër është shpallur në kërkim.
Mësohet se dy vëllezërit bënin pjesë në një grup të stukturuar kriminal në Shkodër, por që kishin edhe bazë në Tiranë.
Minat përgatiteshin në mënyrë artizanale. Dyshohet se lënda shpërthyese ishte përgatitur për larje hesapesh mes bandave, ose e porositur nga persona të tjerë për ndonjë atentat të mundshëm.
Policia informon se “gjatë veprimeve hetimore të kryera në kuadër të procedimit për këtë rast, janë gjetur dhe sekuestruar, në cilësinë e provës materiale, 2 mina me telekomandë, me lëndë eksplozive C4 peshë 300 gram, të programuara për shpërthim në distancë (të pajisura me aparat celular dhe me kapsolla detonatore), të cilat dyshohet se do të përdoreshin për kryerjen e ngjarjeve të rënda kriminale. Gjithashtu janë sekuestruar aparati celular i 20-vjeçarit të ndaluar si dhe një përforcues grushti (dorezë metalike)”.
Vijojnë veprimet e thelluara hetimore, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për të dokumentuar implikimin e personave të tjerë, të përfshirë në këtë veprimtari kriminale./Opinion.al
