Disa ditë më parë në qytetin e Kukësit një grup të rinjsh u konfliktuan fizikisht me njëri tjetrin.
Ditën e sotme,Policia e Kukësit ka identifikuar 5 personat që u përfshinë në këtë sherr masiv në rrugë.
Ngjarja ka ndodhur si pasojë e një konflikti për motive të dobëta.
Katër prej personave të përfshirë në konflikt janë shpallur në kërkim ndërsa vetëm për njërin prej tyre ka nisur procedimi në gjendje të lirë.
“Komisariati i Policisë Kukës identifikoi dhe shpalli në kërkim, për veprën penale “Dëmtime të tjera me dashje”, shtetasit Q. M., 29 vjeç, I. M., 30 vjeç, U. E., 46 vjeç dhe A. E., 48 vjeç. Gjithashtu, për të njëjtën vepër penale u referuan materialet në Prokurori, ku nisi procedimi në gjendje të lirë për shtetasin E. E., 40 vjeç, të gjithë banues në qarkun Kukës”, njoftuan uniformat blu.
Ndërkohë në lidhje me këtë ngjarjen e kanë pësuar edhe disa efektivë policie. Drejtoria e Standardeve Profesionale ka filluar ecurinë disiplinore për një nënkomisar dhe dy inspektorë.
“Ndërkohë, Drejtoria e Standardeve Profesionale në Policinë e Shtetit ka filluar ecurinë disiplinore për specialistin e Seksionit të Rendit Publik të Komisariatit të Policisë Kukës Nënkomisar A. E. dhe për oficerët e Patrullës së Përgjithshme të Komisariatit të Policisë Kukës Inspektor G. T. dhe Inspektor G. M., për shkelje të pikës 1 të nenit 209 të rregullores së Policisë së Shtetit, konkretisht: “Punonjësi është përgjegjës për shkelje të rëndë të atributeve/ kompetencave të Policisë, nëse pa ndonjë arsye bindëse, nuk i përmbush apo dështon në përmbushjen e detyrave dhe përgjegjësive të caktuara, të cilat kanë shkaktuar pasoja te rënda në kryerjen e detyrave””, njoftoi policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës.
