Policia e Shtetit ka dhënë informacion zyrtar lidhur me arrestimin e Ramazan Rrahja, nipin e deputetit të PS, Rrahman Rrahja.
30-vjeçari është arrestuar në një lokal në zonën e Fushë-Krujës, ndërsa gjatë kontrollit i është gjetur një pistoletë me fishek në fole, gati për qitje.
30-vjeçari, që nga momenti i shpalljes në kërkim për atentatin ndaj prokurorit Arjan Ndoji, nuk është larguar në asnjë moment jashtë shtetit, por fshihej në trekëndëshin “Durrës – Lezhë – Tiranë”.
Në momentin e kapjes, mbrëmjen e sotme, Ramazan Rrahja shoqërohej me një shtetas tjetër, në kërkim nga Policia e Elbasanit, për veprën penale “Shtrëngimi me anë të kanosjes ose dhunës për dhënie pasurie”, të kryer në bashkëpunim.
Strukturat operacionale dhe ato hetimore të Policisë së Shtetit, në kuadër të procedimit penal për zbardhjen e atentatit ndaj prokurorit A. N., si dhe në zbatim të urdhrit të ndalimit të lëshuar nga SPAK, pas caktimit nga Gjykata, të masës së sigurisë “Arrest në burg”, për shtetasin Ramazan Rrahja kanë vijuar kërkimet intensive për lokalizimin dhe kapjen e tij.
Në vijim të operacionit policor të koduar “Komploti”, të zhvilluar në janar të vitit 2023, nga Policia e Shtetit, për kapjen e 30-vjeçarit, strukturat operacionale dhe ato hetimore të Policisë së Shtetit dispononin informacion se shtetasi Rrahja aktualisht fshihej në zonën e Krujës.
Në vijim të këtij operacioni është kapur dhe vënë në pranga edhe shtetasi Lusi Konomi K. alias E. Ll., 39 vjeç, i cili shoqërohej me Rrahjam dhe që ishte shpallur në kërkim në kuadër të një procedimi penal të vitit 2023, nga Policia e Elbasanit, për veprën penale “Shtrëngimi me anë të kanosjes ose dhunës për dhënie pasurie”, të kryer në bashkëpunim. 39-vjeçari do t’i dorëzohet Drejtorisë Vendore të Policisë Elbasan, për kryerjen e veprimeve të mëtejshme procedurale.
