Truproja e ministrit të Mjedisit, Lefter Koka është shoqëruar nga policia. Kështu deklaroi mbrëmë gazetari investigativ Artan Hoxha gjatë emisionit “Të paekspozuarit” në News 24. Ai tha se truproja ka qenë në drejtimin e makinës, ku udhëtonte bashkëshortja e ministrit Koka dhe një tjetër person që punon në kompaninë e Kokës. Sipas Artan Hoxhës ky shqetësim është ngritur edhe në mbledhjen e Këshillit të Ministrave.
“Unë nuk e di nëse ka qenë Skuadra e Operacioneve Speciale apo kanë qenë Forcat e Ndërhyrjes së Shpejtë, por kanë shoqëruar truprojën e ministrit të Mjedisit Lefter Koka. Në makinë ka qenë edhe bashkëshortja e tij. Ndërkohë që shoferi është punonjës i Gardës, ka pasur dokumentacion, ka pasur leje arme dhe leje qarkullimi. Ka qenë edhe një përfaqësues juridik i biznesit që ka zoti Koka”, tha gazetari Hoxha.
Sipas tij, kjo histori ka përfunduar me shoqërim në polici të truprojës. “Fakti që u shoqëruar në polici dhe është ndërhyrë me maska…i kanë thënë për një verifikim dhe më pas e kanë lënë të lirë”, tha Hoxha.
“Kjo histori ka krijuar problem dhe prandaj është përmendur Këshilli i Ministrave dhe zoti Koka është ankuar “pse duhet të ma bëni këtë gjë? Zoti Tahiri ka thënë se “është një keqkuptim dhe unë me sa kam komunikuar me Drejtorin e Policisë më ka thënë që kjo është një keqkuptim”. Kjo nuk është kapërdirë kaq lehtë.
Me sa di unë në atë mbledhje ka folur edhe ish-ministri Manjani i cili ka thënë që këto janë metoda për të na krijuar probleme sepse policia nuk mund të ndërhyjë te makinat dhe gratë tona.
Po ta lidhësh pastaj me porosinë që ka dhënë Petrit Vasili që “kini kujdes se policia mund të na vendosë nëpër makina lëndë narkotike…”. policia ka pasur informacion që një makinë deputeti është përdorur për të tilla gjëra”, tregoi gazetari Artan Hoxha.
Deri tani nuk ka asnjë reagim zyrtar nga ministria e Kokës dhe as nga e Tahirit për të mohuar këtë ngjarje./ Opinion.al
