Është nxjerrë ditën e sotme një makinë e mbytur mëngjesin e djeshëm në liqenin e Shkopetit nga polombarët e RENEA-s.
Sipas policisë, ka dyshime se kjo makinë është automjeti që u përdor në grabitjen e parave në pistën e aeroportit të Rinasit.
Pikërisht mëngjesin e djeshëm ka qenë një peshkatar i zonës i cili ka vënë re gjurmë të gomave të një makine në afërsi të liqenit të Shkopetit, ku sipas tij, mund edhe të kishte rënë një makinë.
Pas konstatimit të një fakti të tillë, peshkatari ka lajmëruar menjëherë policinë e qytetit të Burrelit, pasi në liqen mund të kishte rënë një makinë.
Me të mbërritur efektivët e policisë është konstatuar se në afërsi të bregut të liqenit, poshtë rrugës nacionale kishte gjurmë të freskëta të gomave të automjetit si dhe pjesë të parafangos, parakolpit e xhamave të thyer.
Mësohet se aty, policia ka gjetur edhe targën e automjetit, konkretisht targën AA 969ND që i përkiste Benz-it në pronësi të M.P nga Karabunara e Lushnjës.
Mirëpo, targa ishte denoncuar kohë më parë si e vjedhur në Komisariatin e Lushnjës, në janar të 2016.
Ka mjaftuar një kontroll i polombarëve në thellësinë 18 – 25 metra, ku është konstatuar se në liqen ishin dy automjete të mbytura.
Është bërë me dije nga policia, se me ndihmën e një mjeti të rëndë vinç, polombarët dhe forcat e policisë të Komisariatit Mat, kanë bërë të mundur nxjerrjen nga uji të njërit prej automjeteve.
Bëhet fjalë për automjetin tip “Benz” me targa FFV 562 suedeze.
Nga verifikimet paraprake, shenjat e konstatuara si; “llumi mbi sipërfaqet e lëmuara të mjetit”, rezultoi se ai kishte kohë që ndodhej brenda në liqen.
Policia bëri me dije se kërkimet për makinën e dytë nisën sot në mëngjes.
