Dy javë pas aksidentit tragjik, ku humbën jetën dy fëmijë, në autostradën Plepa – Rrogozhinë, mungesa e sigurisë rrugore u merr sërish jetën dy personave të tjerë, të moshës 25 dhe 37 – vjeç.
Policia e Durrësit deklaroi zyrtarisht se, një ndër shkaqet që aksidenti i mëngjesit të së shtunës, në aksin Plepa – Shkozet përfundoi me 2 viktima dhe 4 të plagosur, është fakti se barrierat mbrojtëse të rrugës ishin të dëmtuara dhe jashtë standardit.
Për këtë aryse, policia ka nisur procedimin penal në gjendje të lirë për Hamza Islamajn, 49 – vjeç, administrator i subjektit kontraktues për mirëmbajtjen e kësaj rruge.
Makina tip Pezho me targa të Tiranës, ku gjendeshin dy viktimat dhe 4 të plagosurit përfundoi 50 metër larg rrugës pasi goditi trafikndarësen e betonit dhe më pas u përplas me barrierat, që nuk arritën ta mbanin në rrugë, pasi ishin jashtë standardeve.
Vito Memjeti dhe Ardian Sallaku gjetën vdekjen e menjëherëshme.
Policia tha se drejtuesi i mjetit, Adis Barzezi, 28 – vjeç, i ndaluar tashmë, ishte nën efektin e alkoolit. Për këtë arsye makina e humbi kontrollin. Por nëse barrierat do të kishin qenë brenda standardeve, do ta kishin mbajtur makinën në rrugë.
Kjo është edhe arsyeja përse ato janë vendosur në këtë kthesë të fortë, që është bërë disa herë shkak për aksidente.
Policia dyshon se mosvendosja e barrierave fsheh një aferë korruptive. Bazuar në këto dyshime, çështja është marrë në dorë nga Seksioni për Korrupsionin në Drejtorinë e Policisë së Durrësit.
Firma kontraktuese, me administrator të proceduarin Hamza Ismalaj, ka fituar një tender prej disa milionë lekësh nga Autoriteti Rrugor Shqiptar për mirëmbajtjen dhe sigurinë e këtij aksi. Ai i ka shkelur kushtet e kontratës, duke mos zbatuar me përpikmëri kushtet teknike, siç thotë policia, por nga Autoriteti Rrugor Shqiptar nuk ka patur asnjë masë.
Ashtu si në aksidentin tragjik të dy javëve më parë, kur barriera e ndërprerë metalike e përshkoi tejpërtej autoveturën, në të cilën gjendej një grua 24 – vjeçare me tre fëmijët e saj, duke u marrë jetën dy prej tyre, prokurorisë i duhet të hetojë mbi arsyet se përse mungon siguria rrugore.
Edhe në këtë rast, hetimet do t’i çojnë prokurorët në zyrën e Autoritetit Rrugor Shqiptar.
Për aksidentin e ndodhur në Plepa – Rrogozhinë u arrestuan Drejtori Rajonal i Tiranës, Bib Gjomajak, Drejtori i Sigurisë Rrugore, Lek Tushaj dhe Drejtori Juridik, Dritan Fejzo.
Tv Klan
