Pajisja e shumëpërfolur për përgjime, nuk ka mundur të bëjë asnjë lloj përgjimi. S’ka përgjuar as telefonata, mesazhe apo komunikime në internet.
Është kjo përgjigjja e kreut të Policisë Italiane, Alessandro Pansa, e siguruar nga Televizioni Klan, të cilën ai ia ka dërguar Prokurorisë Shqiptare që po heton kryen hetime.
“Pajisja trajnuese rezulton e konfiguruar në mënyrë të atillë që nuk është në gjendje të bëjë asnjë lloj përgjimi, as përgjime të telefonatave dhe as të mesazheve. Një konfigurim i tillë, që nuk është i modifikueshëm as nga operatorët, nuk lejon as përgjimin e komunikimeve të tjera në internet”.
Në përgjigjen, që i është përcjellë tashmë organit të akuzës përmes Ambasadorit italian në Tiranë, Alberto Kutilo, sqarohet se pasjisja është sjellë në Shqipëri më 11 Mars të këtij viti, në zbatim të marrëveshjes së nënshkruar më 19 Qershor 2007 mes qeverisë italiane dhe qeverisë shqiptare, që parashikon veç të tjerash aktivitete mësimore dhe trajnuese në luftën kundër kriminalitetit në të gjitha format e saj.
“Dy operatorë të specializuar të Policisë Italiane, me detyrën për të kryer trajnime për Policinë Shqiptare, kanë mbërritur në Portin e Durrësit, ku janë pritur nga drejtues të Policisë Shqiptare. Në automjete, personeli italian kishte me vete, për aktivitetet e mësipërme të trajnimit, një autoveturë të pajisur me një pajisje të quajtur “IMSI Catcher”, me modelin Vortex prodhuar nga Ditta Ercom, të instaluar në bordin e saj”, thuhet në deklaratën e kreut të Policisë Italiane.
Zoti Pansa thotë se detyrat e operatorëve italianë janë konkretizuar në aktivitetin e mësimit dhe asistencës teknike për përdorimin e pajisjes për lokalizimin dhe monitorimin e telefonisë celulare.
Shefi i Policisë Italiane nënvizon se pajisja ka qenë gjithnjë nën kontrollin e autoriteteve italiane.
“Pajisja trajnuese ka qëndruar gjithnjë në disponueshmërinë e operatorëve italianë dhe është ruajtur, kur nuk është përdorur për aktivitetet trajnuese dhe mësimore, pranë zyrës italiane të kontaktit, që gjendet brenda Ambasadës Italiane në Tiranë”.
Në mbyllje të përgjigjes, ai thekson edhe njëherë kjo pajisja nuk ka mundur të kryejë asnjë lloj përgjimi.
“Informacionet se janë stërvitur 5 operatorë të Policisë Shqiptare, me aktivitete të zhvilluara në Tiranë, Elbasan e Vlorë, nxjerrin në pah, – siç pasqyrohet, që aktiviteti mësimor në fjalë nuk ka mundur dhe nuk ka konfiguruar dhunim të asnjë lloji, – se personeli i forcave të Policisë Italiane, i impenjuar në ekzektutimin e marrëveshjes gëzon, sipas nenit 8 të saj, për iminutetin e juridiksionit civil, penal dhe administrativ për aktet e kryera në ushtrimin e funksioneve të tij”. Tv Klan
