Policia e Veronës e pagëzoi në shqip operacionin “Malok”, kundër organizatës të trafikut të drogës, e përbërë nga shtetas italianë, shqiptarë dhe nigerianë.
Grupi ishte specializuar në trafikun e kokainës, heroinës dhe hashashit që vinte nga Shqipëria dhe Maroku, për t’iu shpërndarë grupeve të tjerë që do ta shisnin.
Mes të arrestuarve është edhe shqiptari 29 – vjeçar Marjus Bishani.
Hetimet nisën në vitin 2013, pasi një burim informoi forcat e rendit se në zonën e Cerea -s kishte mbërritur një shqiptar, shumë aktiv në tregun e Veronës.
Pas përgjimeve dhe hetimeve, policia kuptoi se nuk bëhej fjalë për shpërndarës të thjeshtë droge, por për grosistë, që kishin llogaritur në detaje shitjen e lëndës narkotike.
