Detaje të reja zbulohen lidhur me operacionin e SPAK, që vijon prej orëve të vona të së mërkurës e që ka çuar në pranga deri më tani 6 persona .
Sipas Klan News, autoritetet kanë ushtruar kontroll në banesat e fisit Bajri. Policia mësohet se ka marrë në pyetje Ilir dhe Safet Bajrin, ndërsa në kërkim është shpallur Behar Bajri.
I ekstraduar nga Holanda në vitin 2019-n, Behar Bajri u la i lirë nga gjykata e Shkodrës një vit më pas, në 2020-n. Në atë kohë, gjykata vendosi ta lërë në masën detyrim paraqitje, pasi mungonin provat për akuzat që kishte ngritur prokuroria, që ishin; vrasje, trafik armësh, gjobëvënie dhe pjesë e grupit të strukturuar kriminal.
Në të shkuarën anëtarët e fisit Bajri janë akuzuar vepra të ndryshme kriminale, nga vrasjet, trafiku narkotikëve e deri tek gjobëvënia.
Sipas informacioneve të deritanishme, në kuadër të operacionit të SPAK, në pranga kanë rënë ish-drejtuesi i Operacionales, Oltion Bistri, i shkarkuar nga detyra vetëm pak ditë më parë, drejtuesi i Prokurorisë së Kukësit, Xhevahir Lita, biznesmeni Pëllumb Gjoka dhe shoqëruesi i tij Edmond Preka.
Mes të arrestuarve po ashtu është edhe Astmer Bilali, i arrestuar në 2018-n si pjesë e grupit “Bajri” në Shkodër.
Në pranga raportohet të ketë rënë edhe Ardit Hasanbegaj, ish-shef për Krimet në Berat, i përjashtuar nga radhët e policisë një vit më parë, pas zbulimit të serave me kanabis në fshatin Drenovicë të Beratit./Opinion.al
