Deputeti i Partisë Demokratike, Bedri Hoxha, ka reaguar sot pas publikimit në një procesverbali të policisë që jep detaje të natës, kur është sulmuar makina e tij. Sipas dokumentit të bërë publik nga policia natën e 24 prillit 2015, Bedri Hoxha, është filmuar nga kamerat e një banke kur del nga makina së bashku me një femër dhe drejtohet për në hotel. Deputeti është kontaktuar nga gazeta “Panorama”. Ai ka deklaruar se ka qenë i vetëm dhe jo i shoqëruar me femër atë natë.
“Hetimet për sulmin ndaj automjetit tim janë mbyllur. Prokuroria më ka dërguar një letër ku më njoftonte mbylljen e tyre dhe se kamerat e sigurisë së bankës aty pranë nuk kishin fushëpamje, por vetëm mund shihnin bankomatet aty”-thote ai.
I pyetur për lajmin e publikuar nga “shqiptarja.com” dhe një procesverbal të policisë, i cili shkruan se, ju atë ditë keni qenë me një femër në makinë dhe se, keni dalë nga mjeti dhe keni hyrë në hotel, Hoxha e mohon kategorikisht.
“Nuk është i vërtetë procesverbali i Policisë. Këto janë përralla dhe shpifje që riciklohen tani në prag fushate. Ai procesverbal nuk ka lidhje me mua. Unë madje kam qenë i vetëm në makinë. Po të isha me ndonjë femër nuk do ta kisha denoncuar fare rastin. Kisha tre miq te hoteli që i kisha njoftuar pasi nuk kisha ku qëndroja. Është shumë e thjesht për ta verifikuar, pasi çdo hotel ka një regjistër të hyrje daljeve të tij”- shprehet deputeti i PD-së.
