Policia në San Francisko ka arrestuar një person, pasi akuzohet për vrasjen tragjike të themeluesit të Cash App, Bob Lee.
Bob Lee 43 vjeç, u gjet i therur me thikë pranë qendrës së qytetit të San Franciskos, ku më vonë vdiq në spital nga plagët e marra.
Lee ishte në San Francisko për një samit dhe thuhet se kishte qëndruar për të vizituar miqtë para vdekjes së tij.
Policia nuk e ka konfirmuar ende identitetin e të dyshuarit për vrasjen e Lee.
Raportet lokale supozojnë se i dyshuari është themelues i një kompanie IT dhe se ai dhe zoti Lee e njihnin njëri-tjetrin.
Mission Local, një media rajonale e lajmeve, e identifikoi të dyshuarin si dikush që punon në industrinë e teknologjisë në San Francisko.Duke cituar burime policore, raporti thoshte se Lee dhe i dyshuari ishin në një automjet së bashku dhe patën një grindje përpara se Lee të goditej me thikë.
Në kohën e vdekjes së tij, Lee ishte shefi i produkteve të kompanisë së kriptomonedhave MobileCoin.
Ai vlerësohet gjithashtu për themelimin e Cash App, një aplikacion pagese i bazuar në smartphone që lejon transferimin e parave nga personi në person.
Aplikacioni është i popullarizuar në SHBA dhe vlen 40 miliardë dollarë (32 miliardë £), sipas Forbes.
Vdekja e zotit Lee ndezi kritika kundër autoriteteve në San Francisko për reagimin e tyre ndaj shkallës së lartë të krimit të dhunshëm në qytet.
Bëhet me dije, se deri më tani ka pasur 56 vrasje në San Francisko në vitet 2021 dhe 2022, dhe të dhënat paraprake të policisë tregojnë se ka pasur 13 vrasje deri më tani këtë vit./Opinion.al
