Protestat dhe trazirat shpërthyen në Paris pasi policia qëlloi për vdekje një 17-vjeçar. Disa makina u dogjën ndërsa në afërsi të komisariatit u hodhën edhe fishekzjarrë. Për të shpërndarë protestuesit, policia përdori gaz lotsjellës.
Policia pretendoi se i riu tentoi t’i përplasë efektivët me makinën e tij, por në një video të bërë publike së fundmi shihet e kundërta. Siç shihet, polici i ka drejtuar armën drejtuesit të mjetit, dhe pas disa sekondash dëgjohet një e shtënë.
Pavarësisht ndihmës së stafit mjekësor, adoleshenti ndërroi jetë si pasojë e plagës së marra. Efektivi i policisë ndodhet në paraburgim dhe mbi të rëndon akuza e vrasjes.
Për ngjarjen reagoi edhe presidenti Macron, i cili tha se ngjarja është e pashpjegueshme dhe e pafalshme për policinë. Kjo është vrasja e dytë fatale në rrethana të tilla për këtë vit në Francë./ Klan News
