Kryeministri Edi Rama ka vizituar në spital efektivin e policisë që u dëmtua në sy gjatë protestave të zhvilluara në kryeqytet.
Kjo vizitë e Ramës në ambientet e qendrës spitalore “Nënë Tereza” është kryer në një kohë kur pranë Kryeministrisë sapo kishin nisur grumbullimet e para të qytetarëve, në vijim të reagimit për vrasjen e 25-vjeçarit Klodian Rasha.
I shoqëruar nga Drejtori i Policisë së Shtetit Ardi Veliu dhe nga Ministrja e Shëndetësisë Ogerta Manastirliu, Rama ka takuar efektivin e policisë dhe familjarët e tij, të cilëve u ka bërë të ditur nisjen për një trajtim më të specializuar.
“Ministrja ka folur me atë spitalin në Turqi, për ta çuar në atë spital të specializuar të ushtarakëve. Por problemi i parë këtu ka qenë që të ndalohet rreziku, pasi ka qenë në rrezik. Deri dje ka qenë përpjekje për ta stabilizuar. Në këtë moment ai bëhet i transportueshëm. Larg qoftë një hemorragji. Shkon edhe më keq se planet që ka. Janë ça gjëra që nuk duhet të ndodhin kurrë, por ça t’i bësh”, i tha Rama babait të efektivit të lënduar. Mjekët e QSUT janë shprehur se pas ndihmës që i është dhënë efektivi i policisë ka nevojë për transplantin e kornesë./Opinion.al
