Sikur të mos mungonin yjet e shumtë të fashuar, sidomos mesfushorët Klaudio Markizio, Marko Verrati dhe së fundmi edhe Rikardo Montolivo, trajneri i Italisë, Antonio Konte, e nis këtë Europian me jo pak akuza që do i rëndojnë mbi shpatulla, në lidhje me listën e tij prej 23 lojtarësh që do të shkojnë në “Euro 2016”. Në mënyrë surprizë, ai la jashtë edhe liderin e Milanit, Xhakomo Bonaventurën, përveçse organizatorin e Napolit, Zhorginjon.
Pa dyshim që kur të gjithë tifozët dhe specialistët qajnë faktin se në repartin e mesfushës cilësia është e pakët, “timonieri” i përfaqësueses vendos të lërë jashtë edhe dy prej fantazistëve më të mirë të këtij sezoni të Serisë A, duke rritur jo pak dozën e akuzës. Në vend të tyre, juventini Stefano Sturaro, për të cilin analistët folën me shumë skepticizëm. Ndërkohë, edhe në mbrojtje, “betejën” për një vend mes Davide Astorit, Daniele Ruganit dhe Anxhelo Ogbonës, e fitoi ky i fundit, ndërsa juventini Rugani është pjesë e listës së rezervave, së bashku me Zapakostën dhe Benasin e Torinos.
Antonio Konte – Aventura drejt Francës nisi dje në “Koverçiano”, në një mbrëmje “gala” ku përveç medias dhe mikrofonave që parakaloi e gjithë “armata”, ishin organizuar edhe disa surpriza, si lidhjet direkte të familjarëve të lojtarëve si Insinje, Pele, El Sharaui e Bernardeski, përpara se fjalën ta merrte udhëheqësi i këtij grupi, Antonio Konte: “E di që do të më akuzojnë, apo që kanë nisur të më akuzojnë për disa prej zgjedhjeve të mia. Edhe unë e kam pasur të vështirë që të lë në shtëpi shumë lojtarë, mbi të gjitha nga pikëpamja humane. Duhet të më kuptoni edhe mua se nuk është e lehtë të bësh të tilla zgjedhje, por unë di që kam punuar me burra të vërtetë, aq më shumë ata që e pranuan në heshtjen mosgrumbullimin nga ana ime, – i përgjigjet Konte pyetjes mbi lënien jashtë të Zhorginjos dhe Bonaventurës.
– Por tani gjithçka është vendosur dhe nuk ka më kthim prapa. Ky është grupi që do të na përfaqësojë, një grup i cili ecën në të njëjtin drejtim. E dimë që na pret një luftë e ashpër, por të gjithë besojmë se do të jemi gati për ndeshjen e parë, atë kundër Belgjikës, një prej pretendenteve kryesore për fitoren finale. Roli ynë? Ne rolin tonë duhet ta fitojmë në fushë, duhet të tregojmë se nuk jemi inferiorë ndaj askujt. Besoj te ky grup”.
“Në Francë, të vëmë skafandrën dhe të lëshohemi në sulm”
Xhanluixhi Bufon është i ndërgjegjshëm se mungesat e shumta i kanë mohuar jo pak cilësi dhe optimizëm Kombëtares së Italisë, por për kapitenin dhe portierin e “axurrëve” kjo nuk do të thotë se nuk mund të luftojnë si të barabartë. “Në këto 20 vite që jam pjesë e kombëtares, mbaj mend që vetëm dy herë jemi nisur si favoritë, në Botërorin 2002 dhe në Europianin 2004, por nuk është se ky fakt na ndihmoi. Prandaj, as që shqetësohem që të jetë dikush tjetër që ta nisë këtë udhëtim në Francë si favorit. Unë di që edhe pse kemi shumë mungesa, ky është një grup tek i cili tifozët, e gjithë Italia kërkon të ndihet krenare. Dhe pikërisht kjo është ajo që ne duhet të bëjmë. Në këtë Europian duhet të shkojmë me vullnetin dhe bindjen se do të bëjmë një aventurë të bukur, serioze. Ashtu si në luftë, duhet vetëm të vëmë skafandrën në kokë dhe të sulmojmë kundërshtarin, të marrim fatin tonë në dorë, duke mos pritur askënd që të gabojë për të përfituar ne”.
