Pas shqiptarëve të Kosovës, polakët, italianët dhe gjermanët janë turistët që kanë pushuar më së shumti në Shqipëri përgjatë Gushtit. Të dhënat e INSTAT tregojnë se 9% e 462 mijë të huajve të regjistruar në struktura akomoduese në gusht ishin polakë dhe gati 7% italianë.
Në krahasim me vjet numri total i vizitorëve jo-rezidentë në hotele dhe ambiente të ngjashme është rritur me 51%. Por shifrat e të huajve të raportuara nga strukturat akomoduese përbëjnë pakicën e numrit total të të huajve të hyrë në Shqipëri përgjatë muajit të tetë të vitit.
Konkretisht nga 2.1 milion të huaj të ardhur në Shqipëri, vetëm 21% e tyre rezulton se kanë qëndruar në struktura akomoduese, duke e rikthyer edhe njëherë vëmendjen tek problemet e informalitetit të tregut.Sakaq për muajin Gusht rezulton se rajoni qendror ka pritur numrin më të lartë të vizitorëve të huaj, pasuar nga jugu i vendit. Deri në muajin Gusht, Shqipëria numëron 9.7 milion turistë të huaj që kanë vizituar këtë vit vendin tonë./ Tv Klan
