Edhe në Pogradec janë zhdukur hapësirat e plazhit publik. Armand Male, banor i këtij qyteti thotë se zënia e hapësirave publike në plazhin publik tradicional të qytetit ndodh për herë të parë këtë vit. Banorët e Pogradecit, të cilët kanë vijuar historikisht të bëjnë plazhin në afërsi të Turizmit dhe deri tek “1 Maji”, aty ku një pjesë e mirë e qytetit ka dhe banesat e tyre.
Një tjetër problem për pushuesit në qytetin e Pogradecit përfshi këtu edhe ata që vijnë nga qytete të tjera është papastërtia e bregut të liqenit.
Varkat, një tjetër shqetësim
Në bregun e liqenit të Pogradecit ndodhen më tepër se 500 varka. Pjesa më e madhe e tyre përfshi dhe ato të drurit jepen me qira nga pronarët e këtyre mjeteve lundruese edhe duke mos plotësuar asnjë kusht lundrimi kolektiv. Mbytjet më të shumta vitet e fundit kanë ndodhur me persona të cilët kanë marrë varkat për vozitje. Së pari, sepse nuk kanë njohuri të mjaftueshme për vozitje me rrema dhe së dyti pasi hyjnë në thellësi hidhen nga varkat pa ditur mirë të notojnë. Dikur një mjet lundrues i ndalonte të kalonin “vijën e rrezikut”, ndërsa këtë vit mjeti që varet nga drejtoria e kufirit nuk është parë asnjë ditë në plazhin masiv të paktën. /Shekulli
