Futbolli modern është i tejmbushur me regjisorë dhe nuk e kemi fjalën për ata në fushë si Andrea Pirlo apo Mesut Ozil. Fjala është për ata të cilët inskenuan telenovelën verore “Paul Pogba”, e cila dje pati serinë e fundit. Po, Manchester United në mesnatën që lamë pas kreu zyrtarisht transferimin më të shtrenjtë në historinë e futbollit, duke blerë francezin për 120 milionë euro.
Lojtari më i lakuar në merkaton e verës la Juventusin, aty ku u transferua në vitin 2012 me parametra zero. 23-vjeçari, i cili pritet të veshë fanellën me numrin 6, ka firmosur një kontratë që e lidh për pesë vite me klubin anglez. Ai ka edhe një opsion për të rinovuar me një vit. Paga javore e mesfushorit të talentuar është 290 mijë paundë, një çmenduri. Duke folur në sajtin e klubit, Pogba tha: “Jam i lumtur që i ribashkohem Unitedit. Ky klub gjithnjë ka pasur një vend special në zemrën time dhe me të vërtet që po e pres me padurim punën me trajnerin Jose Mourinho. E kam shijuar pafund kohën time te Juventusi dhe kam disa kujtime fantastike të një klubi madhështor me lojtarë të cilët i konsideroj miq. Por ndiej se tani është koha e duhur për t’u rikthyer në ‘Old Trafford’. Me të vërtet që e kam shijuar gjithmonë të luaja përpara tifozëve dhe mezi po pres të jap kontributin tim për skuadrën. Ky është klubi i duhur për mua për të arritur gjithçka që shpresoj.”
Trajneri Jose Mourinho e lavdëroi tejmase lojtarin e tij të ri për zgjedhjen e bërë. “Paul është një nga lojtarët më të mirë në botë dhe do të jetë një pjesë kyçe e skuadrës që unë dua të ndërtoj këtu për të ardhmen. Ai është i shpejtë, i fortë shënon gola dhe lexon ndeshjen më mirë se shumë lojtarë më të vjetër se ai. Në moshën 23-vjeçare, ai ka shansin ta bëjë të vetin atë pozicion këtu për shumë vite. Ai është i ri dhe do të vijojë të përmirësohet; ai ka shansin të jetë në zemrën e këtij klubi për dekadën e ardhshme dhe më vonë”, – u shpreh portugezi pa i fshehur emocionet.
Pogba bëri edhe “politikanin” duke shpjeguar me një postim në “Instagram” se Manchester United nuk e largoi atë para katër vitesh, por ishte një vendim i përbashkët për të mirën e të gjithëve. “Largimi nga Manchester United kur isha 18 vjeç ishte një vendim i përbashkët ndërmjet meje dhe klubit dhe ishte gjëja e duhur për t’u bërë atëherë. Tani është koha të kthehem. ‘Old Trafford’, ja ku jam!” – shkroi nënkampioni i Evropës me Francën, i cili nuk e harron kurrsesi ish-skuadrën e tij, Juventusin.
“Kam respektin më të madh për klubin që pranoi të më kishte para disa vitesh. Juventusi gjithnjë do të jetë pjesë e imja dhe do të më mungojë gjithmonë, do ta dua dhe do t’i jem mirënjohës klubit, skuadrës dhe sidomos tifozëve. Shpresoj të ma respektojnë vendimin tim. Pjesa më e bukur e një miqësie është të kuptosh dhe të të kuptojnë. Është e vështirë të shpjegosh në pak fjali, por e mora vendimin tim i udhëhequr nga zemra dhe asgjë tjetër. Ky transferim mori shumë kohë, sepse ishte një vendim i madh dhe përfshiu shumë mendime dhe punë. Vonesa ishte mërzitëse për mua ashtu si për ju. U kërkoj falje të gjithë mbështestëve që nuk u kam kthyer mesazhe, por kjo nuk më lejohej me ligj.” “Mister 120-milionëshi” dje pasdite udhëtoi për në kompleksin e stërvitjes së klubit me një “Chevrolet” të kuq për t’iu nënshtruar provave mjekësore para se të ulej me avion privat nga Nice, teksa më parë kishte qenë në New York. Me të kaluar testet, francezi Pogba kreu të gjitha procedurat e tjera të transferimit, përfshirë edhe videot promovuese me sponsorin “Adidas” dhe fotot e prezantimit të tij si “djall”.
