Katër emigrantë janë mbytur në ujërat franceze duke u përpjekur të kalonin Kanalin e La Manshit të dielën, sipas agjencisë së lajmeve AFP.
Rreth 70 njerëz u munduan të hipnin në një anije të vogël, e cila u mbyt duke tentuar të nisej nga një plazh në orët e para të së dielës, sipas mediave franceze.
Dhjetëra prej tyre u nxorën nga uji nga ekipet e shpëtimit në qytetin Calais në veri të Francës. Autoritetet lokale njoftuan se katër emigrantët e mbytur ishin nga Iraku dhe Siria.
Emigrantët hasën probleme menjëherë pasi anija u nis nga bregdeti francez në drejtim të Anglisë rreth orës 2:00 mëngjesin e së dielës, sipas AFP-së.
Një anije patrulluese shkoi në vendin e ngjarjes dhe gjeti trupat e pajetë.
Ndërsa dhjetëra të mbijetuar u dërguan në një qendër të komunitetit lokal.
