Kreu i Bashkisë së Tiranës, Erion Veliaj ka mbërritur në Gjykatën e Posaçme kundër Krimit të Organizuar dhe Korrupsionit për seancën e parë të gjyqit me ish-kryeministrin Sali Berisha, të cilin e ka akuzuar për shpifje.
Kryebashkiaku Veliaj ka paditur Berishën në lidhje me deklaratat e këtij të fundit për vizita të Veliajt në Iran. Po ashtu Berisha ka hedhur edhe akuza të tjera ndaj Veliajt për këtë çështje. Pak ditë më parë, Berisha, nga selia e Partisë Demokratike, deklaroi se Erion Veliaj po pastron paratë e Gardës Revolucionare të Iranit.
“Të dhëna të qarta lidhin djegësin e Tiranës, Erion Veliajn me Bruno Presecin dhe Ali Aliabadin, ish-komandantin e Pasdaran, tani sipërmarrës i madh në Iran, nën sanksione ekonomike të BE dhe SHBA. Unë e kam denoncuar këtë lidhje me Iranin të Erion Veliajt, siç jeni ju dëshmitarë. Erion Veliaj nuk ka guxuar kurrë të përgënjeshtrojë qoftë edhe njëherë të vetme, denoncimin e kësaj lidhje të rrezikshme për Shqipërinë. Lidhja e Erion Veliajt me Teheranin nuk është e re. Daton 15-20 vjet më para. Udhëtimet e tij të shpeshta janë denoncuar nga shërbime të vendeve partnere. Unë i kam denoncuar ato publikisht. Tani rezulton se pronar kryesor në dokumente i kompanisë së inceneratorit të Tiranës është Bruno Preseci, i cili në fakt ka për ortak një kompani që thuhet se është po e tij. Pra, në dokumente ai figuron ortak me 43 përqind, por duke pasur parasysh se kompania tjetër italiane, thuhet se është po e tij, ai shkon në 80 përqind aksioner i kompanisë së Erion Veliajt”-tha Berisha.
