Zhuliet së bashku me bashkëshortin e saj prej pak ditësh kanë zgjedhur të vizitojnë Tiranën. Të tërhequr nga historia, ata vlerësojnë natyrën e bukur dhe misterin e pazbuluar ndër vite.
“Dëgjuam për Shqipërinë nëpërmjet një mikut tonë që jeton në Francë dhe menjëherë u intriguam për ta vizituar. Kemi planifikuar të qëndrojmë edhe 5 ditë dhe nga ajo që kemi parë deri tani gjithçka është e mrekullueshme, si përsa i përket peisazhit, por edhe historia e kultura. Nuk do të largohemi pa vizituar edhe bregdetin e bukur.”
Për ekspertët sezoni i ri turistik pritet të sjellë rritje deri në 15% të vizitorëve në vendin tonë, shifra të cilat natyrshëm përkthehen në të ardhura të shtuara për ekonominë.
“Sivjet presim me një rritje të paktën 10 apo 15%. Të paktën duhet të shkojmë në 520 Euro për turistë në mënyrë që të justifikohet i gjithë zhvillimi dhe investimet që po bëhen në vendin tonë”, shprehet eksperti i turizmit Feriolt Ozuni.
Për të rritur standardin e ofrimit të shërbimeve strukturat hoteliere kanë shtuar investimet, teksa këtë vit kërkesa për prenotime vjen me një risistemim të paketave nga ana e operatorëve tanë.
“Nuk është vetëm plazhi, për të cilin rezervojnë, por kemi edhe rezervime për në Tetor apo në Nëntor për ekskursione dhe ture. Në tërësinë e vetë mund të themi që jemi në një rritëm prej 30-40% të kapaciteteve e shpërndarë pothuajse në të gjithë teritorin e vendit”, thekson Ozuni.
Vitin që lamë pas vendi ynë shënoi një rekord prej 11.5 mln vizitorësh, ndërkohë që të ardhurat e të cilëve përllogariten në rreth 5 mld Euro./ Tv Klan
