Partia Demokratike duket se do tu bashkohet protestave të shoqërisë civile kundër importit të mbetjeve. Sot Grida Duma pasi solli një sërë arguemntesh për tenderin e impiantit të mbetjeve në Fier tha se qytetarët duhet të ngrihen kundër ligjit të qeverisë.
Grida Duma shprehet se kompania që ka fituar tenderin në Fier është regjistruar për këtë shërbim 15 ditë pas shpalljes së tenderit.
Bëhet fjalë për për dhënien me koncesion të ndërtimit dhe administrimit të impiantit të trajtimit të mbetjeve urbane të Qarkut Fier. Kompania fituese e tenderit “Integrated Technology Services” e regjistruar për aktivitet në fushën e Teknologjise së Informacionit papritur, në korrik 2016, shton në objektin e aktivitetit te saj edhe ndërtimin e impianteve të trajtimit të mbetjeve me djegie (Incenerator) dhe landfille për përpunimin e mbetjeve urbane dhe të rrezikshme.
Ndërsa më 15 shtator (pak dite para miratimit të ligjit) njoftohet se një bashkim operatorësh me administrator dhe ortak të vetëm Klodian Zoto ka fituar garën për kontratën koncesionare me një afat 6 vjeçar.
Duma thotë se “gjithçka është bërë në fshehtësi të plotë. Në errësirë të plotë, dhe me shpejtësi marramendese. Ky është interesi i Edi Ramës dhe jo kompanitë e riciklimit që i përdor për shoë”.
Sipas Dumës, kjo është arsyeja se pse Rama e anuloi referendumin për ligjin e mbetjeve dhe sot riktheu ligjin dhe anatemon kundërshtarët e tij.
Pyetjet që shtroi znj.Duma janë:
“A do të digjen në këto impiante mbetje, që do të importohen në Shqipëri?!
Me pretekstin e ligjit a do t’i hapë Edi Rama kufijtë, mafias se plehrave të rrezikshme ashtu siç bëri për baronët e drogës?!
Ky është shqetësimi i çdo shqiptari sot.”
Në fund ajo i bëri thirrje qytetarëve të bashkohen në protesta për ta ndaluar këtë projekt të Edi Ramës që do të ndosë Shqipërinë.
