Ndodhur përballë këtij pirgu plehrash, që fillon nga Llogaraja dhe përfundon në Jonufër, kreu i Njësisë Administrative Orikum kërkon ndërhyrjen urgjente të Bashkisë Vlorë, por edhe të qeverisë.
Sipas tij, zgjidhja përfundimtare për menaxhimin e mbetjeve është landfilli i Sheristës.
Selim Haskoleca, kreu i Njësisë Administrative Orikum: Gjendemi në një gjendje brutale, kërkojmë ndërhyrje të menjëhershme qoftë edhe nga shteti, për hapjen e landfllit të Sheristës, që do t’i japë përfundimisht zgjidhjen.
Zgjidhja, sipas tij duhet të vijë para sezonit turistik, ndryshe një skandal i tillë mjedisor do shoqërojë edhe këtë vit, jo vetëm banorët e zonës por edhe turistët që shpesh zgjedhin Shqiperine pikerisht per të pushuar në bregdetin Jonian.
Selim Haskoleca, kreu i Njësisë Administrative Orikum: Me këtë landifll në anë të rrugës është sikur të bësh reklamën e së keqes, jo të mirës për Orikumin. Duhet të ketë një zgjidhje para sezonit. Problematike bëhet në periudhën e verës, prodhohen 30-40 ton në ditë.
Pamela Dhima, gazetare Tv Klan: Kjo është panorama që vjen drejpërsëdrejti nga Orikumi i vlorës, një nga atraksionert turistike që lidhet me plazhet e bukura të jugut dhe ujërat e kristalta.
Haskoleca thotë se kanë kërkuar ndihmën e bashkisë por pa rezultat, ndërsa pohon se ky vendgrumbullim i hapur prej vitit 2002 me një vendim të këshillit Bashkiak kur Bashkia Orikum ka qenë me vete është në kundërshtim me ligjin, pasi është i ndërtuar afër qytetit dhe buzë lumit.
Selim Haskoleca, kreu i Njësisë Administrative Orikum: Bashkisë së Vlorës ne ia kemi kërkuar por morëm përgjigje që do hapet landfilli i Sheristës në 2021, dhe kjo do mbyllej. Gjithë ky problem ka qenë se gropa hapej dhe hidheshin mbeturinat dhe mbulohej, mirëpo kaluan vitet dhe sot jemi në këtë situatë. Sot jemi në gjendjen emergjente.
Një skandal i tillë mjedosor ka vështirësuar jetesën e banorëve përrreth për shkak të erës së padurueshme./tvklan
