Zëvendës Kryeministrja Senida Mesi është shprehur publikisht lidhur me platformën antikorrupsion të prezantuar një ditë më parë nga Partia Demokratike, që deklaroi se do të anulojë kontratat konçensionare të lidhura në mënyrë klienteliste.
Në një intervistë në edicionin qendror të lajmeve në “Vizion Plus”, Mesi tha se nuk justifikon sulmet e politikanëve ndaj biznesit dhe as një opozitë që kërcënon investitorët me prishje kontratash në rast se vjen në pushtet.
“Unë besoj se duhet të largohemi nga sulmet politike ndaj sipërmarrjes, përkundrazi të forcojmë kulturën e sipërmarrjes dhe të mbështesim çdo investim të huaj apo vendas në funksion të zhvillimit ekonomik e social të vendit; Ndaj dhe nuk justifikoj sulmet e politikanëve ndaj bizneseve dhe nuk justifikoj as njëopozitë që kërcënon investirorët me prishje kontratash nëse vjen në pushtet thua se shteti nuk funksionon dhe kryetari i partisë vendos kush investitor do qëndroj e kush do iki”, tha Mesi duke shtuar se opozita është mëse e mirëpritur të propozojë ndryshime ligjore apo platforma zhvillimore në këtë drejtim, por se këto kërcënime në kurriz të zhvillimit ekonomik të vendit janë të papranueshme.
Gjatë intervistës, Mesi u pyet edhe lidhur me vettingun në politikë, ku ashtu sikurse në kuvend përforcoi qëndrimin se mazhoranca është e hapur të bashkëpunojmë me opozitën për vettingun në politikë, por pa bërë asnjë kompromis sa i takon thellimit të reformës në drejtësi dhe ngritjes së organeve të reja si SPAK dhe BKH.
“Pastrimi i politikës së inkriminuar nuk është akt etik dhe retorik sikurse ka zgjedhur të veprojë opozita, është mbi të gjitha akt juridik dhe ndaj ne ia besojmë këtë akt organeve të reja të drejtësisësi SPAK dhe BKH. Ne jemi gati për vetting, por për vetting të vërtetë duke ia besuar organeve të reja e të pavarura të drejtësisë”, tha Mesi.
