Zëvendëskryeministrja Belinda Balluku, në daljen e saj për mediat në përfundim të mbledhjes së qeverisë, u pyet nga gazetarët në lidhje me platformën “Aktivisti”, të përdorur nga aktivistët e PS.
Gjatë fjalës së saj, Balluku tha se ky aplikacion nuk është gjë tjetër veçse një aplikacion si gjithë të tjerët.
Sipas Ballukut, askush nuk është i detyruar që të ndjekë ministrat apo aktivitetet e tyre në këtë platformë, ndërsa i bëri thirrje edhe ish-kryeministrit Sali Berisha që të logohet aty dhe të shikojë se çfarë ndodh.
“Sa etike është që punonjësit e administratës shtetërore të jenë të detyruar të pëlqejnë, bëjnë LIKE apo edhe të komentojnë mbi postimet tuaja, të ministrive të tjera për punët që bën qeveria?
Së pari, sapo ka mbaruar një konferencë për shtyp nga selia e PS, që është edhe poseduese e kësaj platforme që quhet “Aktivisti”.
Së dyti, ju keni një fakt, keni diçka për të besuar që janë të detyruar punonjësit e administratës ta bëjnë këtë gjë? Sepse punonjësit e ministrisë që unë drejtoj, nuk ka qenë askush i detyruar, por ju siguroj edhe për institucionet e tjera, për të ndjekur platformën.
Pra, kjo platformë siç u sqarua edhe nga PS, sepse unë jam edhe drejtuese qarku, është një platformë transparente ku mund të logoheni edhe ju, mjafton emri juaj edhe vendi nga jeni. Mund të logohet edhe z. Berisha, nëse është kurioz se si funksionon platforma.
Nuk ndodh asgjë tjetër përveçse asaj që ndodh edhe në Facebook dhe Instagram. Është një aplikacion si gjithë aplikacionet e tjera”-tha Balluku.
