Plas te Rumania, në prag të ndeshjes me Shqipërinë. I kryqëzuari më i madh është trajneri i kombëtares së këtij vendi, Angel Jordanesku. Ky i fundit është sulmuar si i vjetëruar në metoda pune nga një ish-futbollist i kësaj kombëtareje, ndërsa nga ana tjetër, “Gazeta Sporturilor” ka njoftuar mesditën e sotme në mënyrë ekskluzive se nuk do t’i rinovohet kontrata nga Federata Rumune e Futbollit. Pra, fati i këtij trajneri është deri diku edhe në duart e Shqipërisë, kombëtarja e së cilës do të luajë të dielën, në orën 21:00, në Lion, ballafaqimin e fazës finale të Europianit të kësaj vere. Kuqezinjve u nevojitet një fitore me dy gola, që të shpresojnë të përparojnë më tej në këtë turne, ndërsa tri pikët u duhen edhe rumunëve për të njëjtin qëllim.
Aktualisht, FRF e ka vendosur t’i vazhdojë pa Jordaneskun kualifikueset e Kupës së Botës në vitin 2018, por nuk dëshiron ta bëjë publik vendimin derisa vijon ndeshjet në Grupin A të “Euro 2016”. Burime nga federata flasin për këtë, pa marrë parasysh se si do të përfundojë aventura e “tricolor” në Francë. Jordanesku ka pak shanse për të qëndruar më gjatë në krye të kombëtares. Për të mos thënë zero shanse! Në fakt, FRF do t’i përgatisë atij një post në administratë, pse jo si drejtor teknik për ekipet kombëtare. Natyrisht, me një pagë shumë më të ulët se 30.000 euro neto në muaj, sa merr tani.”
