Një 49-vjeçar mbeti i plagosur dje në zonën turistike të Thethit ndërsa policia vuri në pranga një 19-vjeçar si autor të dyshuar.
Një ditë më pas dalin në pah edhe motivet e kësja ngjarje, që dyshohet se fshehin pas xhelozinë që i plagosuri Naim Topuzi kishte ndaj 19-vjeçarit FLorian Kodra, duke menduar se i ngacmonte gruan 48-vjeçare.
I plagosuri, la Tiranën për të menaxhuar në Theth bizneset familjare të së shoqes me të cilën nisi jetesën vite më parë.
Sipas Policisë, ngjarja ndodhi rreth orës 06:45, kur Nazmi Topuzi ka dalë në oborrin e shtëpisë së vjehrrës së tij, ku ai jetonte bashkë me të shoqen. Burime nga grupi hetimor bënë të ditur se Nazmi Topuzi është zënë në pritë nga i riu, pas një debati që kishin pasur mes tyre disa ditë më parë për shkaqe xhelozie. Siç mësohet, para pak ditësh Florian Kodra kishte shkuar në shtëpinë e të plagosurit për të mjekuar kërthizën nga vjehrra e tij (mjekim popullor), raporton Panorama.
Nazmi Topuzi, pasi ka mbaruar punën në biznesin familjar që menaxhon në Theth, është kthyer në shtëpi dhe aty ka gjetur të riun. 19-vjeçari është munduar që t’i shpjegojë arsyet se përse kishte shkuar në shtëpinë e tij, por aty ka nisur debati, pasi Nazmi Topuzi është bërë xheloz për gruan e tij.
I riu i ka mohuar akuzat që i ka bërë Nazmi Topuzi për gruan e tij, por ai nuk është bindur dhe i irrituar ka debatuar duke shkuar gati në përleshje mes tyre. Pak ditë pas këtij debati të pasqaruar mes tyre, 19 vjeçari në orët e mëngjesit të djeshëm e ka ruajtur 49 vjeçarin dhe sapo ka dalë në oborrin e shtëpisë së vjehrrit të tij, e ka qëlluar me katër plumba me armë zjarri automatik.
Topuzi ka marrë dy plumba, duke u plagosur rëndë. Ajo që ka dëshmuar për debatin ka qenë gruaja e të plagosurit.
