Gjykata e krimeve të rënda vendosi arrest me burg për 37 vjeçarin, që dy ditë më parë plagosi prindërit dhe vëllanë e ish-gruas së tij, në banesën e tyre. Marjan Levanti, personi që qëlloi me thikë prindërit e ish-bashkëshortes dhe vëllanë e saj, mbeti në qëli me masën e sigurisë “arrest me burg”. Ishte gjykata e krimeve të rënda që zhvilloi seancën gjyqësore me dyer të mbyllura, ku me kërkesë të prokurorisë vendosi që Levanti të qëndroi në qeli deri në pëfundim të hetimeve, për akuzën e “vrasjes për shkak të marrëdhënieve familjare” të mbetur në tentativë.
Burimet thanë se në sallën e gjyqit, ai ka pranuar goditjen me thikë ndaj prindërve të ish-bashkëshortes dhe kunatiti të saj, duke pretenduar se ka problem shëndetësore. Këto problem, ka thënë ai, i janë shkaktuar që pas ndarjes nga bashkëshortja, e cila nuk e lejonte të takonte fëmijët. Ai akuzoj ish-vjehrrin se ka abuzuar fizikisht me djalin e tij, ç’ka sipas tij, ishte acaruar duke e qëlluar me thikë.
Nga ana tjetër, prokurori tregoi momentet e ngjarjes, duke shpjeguar se ka qenë Marjan Levanti i cili ka shkuar në banesën e prindërve të ish-bashkëshortes dhe është fshehur poshtë krevatit të dhomës së gjumit, duke pritur ish-bashkëshorten të kthehet në dhomë që të flisnin për ribashkim. Por në momentin që ka dalë nga poshtë krevatit, ish-bashkëshortja është trembur duke kërkuar ndihmë dhe bërtitur. Në atë moment, kanë ndërhyrë prindërit e saj, duke i kërkuar Marjan Levantit që të dilte nga shtëpia.
Në debat e sipër, ai ka marrë një thikë në kuzhinë duke e qëlluar të dy prindërit e ish-bashkëshortes. Në këtë moment, ka ndërhyrë edhe ish-kunati i tij, por edhe atë e ka qëlluar me thikë në gjoks, duke e plagosur. Më pas, është larguar nga banesa, ku edhe është arrestuar nga policia, ku edhe ka pranuar krimin. Ngjarja për të cilën Marjan Levanti doli para gjykatës, ka ndodhur në zonën e Unazës së re në Tiranë 3 ditë më parë.
