Policia e Tiranës ka arrestuar një 19-vjeçar në lidhje me plagosjen e djeshme në “Qytetin Studenti”. Ai goditi një 20-vjeçar me thikë, i cili ndodhet në spital nën kujdesin e mjekëve. Në lidhje me ngjarjen është proceduar edhe një 52-vjeçar. I riu nga Kamza dyshohet se e ka blerë thikën tek ky person.
“Specialistët e Seksionit për Hetimin e Krimeve në Komisariatin e Policisë Nr. 1 arrestuan shtetasin A. A., 19 vjeç, banues në Kamëz, si dhe proceduan në gjendje të lirë shtetasin E. T., 52 vjeç, banues në Tiranë. Shtetasi A. A., ditën e djeshme, në “Qytet Studenti”, ka goditur me mjet prerës shtetasin A. D., i cili si pasojë është dëmtuar dhe ndodhet në spital, në kujdesin e mjekëve. Nga veprimet hetimore të kryera ka rezultuar se autori i dyshuar e ka blerë mjetin prerës nga shtetasi E. T”, njoftoi policia.
