Shpërthimi i pazakontë Ilir Metës ditën e djeshme, në një fjalim mbushur dhe me nota të forta idealizimi, përveç kërcënimit për qeveri teknike, mbyllje të karrierës së ambasadorëve apo xhevahireve me theks të fortë atdhetar të tipit “të bëhemi si Mujo Ulqinaku”, kishte një lejtmotiv, që realisht nuk ishte dhënë në asnjë fjalim politik.
Ky lejtmotiv e ka emrin burg, që përmendet nga Meta edhe në vetën e parë, pra për veten e tij, por edhe për Sali Berishën dhe eEdi Ramën.
Dhe kjo pjesë nuk u analizua nga asnjë opinionist, të molepsur e të entuziazmuar nga fjalimi i kreut të LSI-së.Sonila Meço e quajti fjalimin më të arrirë ndonjëherë. Kurse Agron Gjekmarkaj, e quajti “fjalim prej burri shteti”.
Megjithatë nuk u morën me atë pse Ilir Meta shqiptoi fjalën burg dhe e shqiptoi më shumë se një herë.
E ka përmendur burgun gati në gjysmën e fjalimit të tij, por fraza apo grupi i fjalive ku ndodhej shprehja prapa hekurave është njëra që përbën më emblematiken.
“Kam dëgjuar lloj-lloj historish, ashtu si edhe ju. Që kjo reformë bëhet për të futur në burg Sali Berishën dhe Ilir Metën, nuk i keni dëgjuar ju këto? Që Ilir Metës nuk i japin vizë amerikanët e shumë të tjera. Që kjo reformë bëhet për të futur në burg Berishën, Ilir Metën, Ramën apo tjetrin. E bëj unë burgun për të gjithë politikanët shqiptarë, absolutisht. Dhe ku të kenë dëshirë edhe partnerët tanë, në Uashington apo në Alaskë apo në Bruksel”.
Një shprehje që duke u thënë publikisht merr vlerën jo të një thashethemi, por të një version apo mundësie.
Në mënyrë të qartë, Meta thekson se si në Uashington apo në Bruksel, zyrtarë të ndryshëm kanë përmendur burgun për të. Dhe prej dy vjetësh kreu i Kuvendit po lobon pikërisht në heshtje për të kundërshtuar akuzat dhe dosjet që gjenden në kancelaritë perëndimore.
Dosja më e fundit është ajo “Balili” ku Ilir Meta është tronditur pasi ish-zyrtari i tij që nuk është arrestuar mendohet se është një i penduar i DEA-s amerikane. Ashtu si Altin Rrapo apo dhe Kastriot Ismaili.
Tesheshi.com i ka shkruar të gjitha këto versione që në vizitën e parë të Metës në DEA apo edhe në Departamentin e Drejtësisë një vit më parë. Por tani ky version doli nga goja e vetë protagonistit. Meta tha se “jam gati të bëjë burgun” dhe përmendi Alaskën, Uashingtonin por edhe Brukselin.
Po pse atje de jo këtu në Shqipëri?! Mos bëhet fjalë për vepra penale që përfshihen nën juridiksionin amerikan dhe europian?! Si është e vërteta?! Natyrisht ajo nuk mund të thuhet me një fjalim, por do të sqarohet nga protagonistët, përkatësisht amerikanët dhe gjermanët që e kanë mënjanuar publikisht Metën duke gjetur si interlekutor politik vetëm Edi Ramën dhe Lulzim Bashën.
Por me fjalën e djeshme, Ilir Meta shpërtheu duke kërcënuar me krizë. Dhe tani ai është intereluktor jo për politikë, por për të zgjidhur krizën pasi kërcënon destabilizimin. Meta përmendi Mujo Ulqinakun dhe menjëherë mori përgjigjen e të rinjve të LRI-së që bënë të ditur se janë gati të flijohen për të, por në versionin “Mujo për Shqipërinë”.
Kallogjeroviç, kryetarja e sapozgjedhur e LRI-së shkruante në FB se “jemi gati të bëhemi të gjithë Mujo Ulqinakë!” /tesheshi.com/
