Policia e Lezhës ka arrestuar dy persona, pas njëri kishte thyer vendimin e Gjykatës “arrest shtëpie”, ndërsa miku i tij qarkullonte me armë zjarri.
24-vjeçari i cili ishte dënuar nga Gjykata me masën e sigurisë “arrest shtëpie” për veprën penale “Goditje për shkak të detyrës” u arrestua në aksin rrugor Rrëshen– Milot, teksa lëvizte me automjetin e tij.
Ndërkohë, së bashku me E.N., në automjet ndodhej dhe një 28-vjeçar të cilit pas kontrollit nga policia iu gjet një armë zjarri tip pistoletë si dhe disa fishkë.
Njoftimi
Strukturat e Drejtorisë Vendore të Policisë Lezhë kanë marrë informacion nga qytetarët se një shtetas i cili ishte me masë sigurie “Arrest shtëpie” po qarkullonte me makinë në Rrëshen sëbashku me një shtetas tjetër i cili dyshohej se kishte armë zjarri me vete.
Mbi bazën e informacioneve të qytetarëve, njësia operacionale “Shqiponja” pranë Drejtorisë Vendore të Policisë Lezhë në bashkëpunim me forcat policore të Komisariatit të Policisë Mirditë, kanë ndërhyrë duke bërë bllokimin e automjetit dhe të dy shtetasve që ndodheshin në të.
Në pranga ranë: E.N., 24 vjeç, banues në Lezhë, i cili udhëtonte me mjetin e tij larg banesës, në aksin rrugor Rrëshen – Milot, edhe pse ndaj tij më vendim datë 10 Prill 2019, Gjykata e Apelit Shkoder kishte caktuar masën e sigurisë “arrest në shtëpi”, për veprën penale “Goditje për shkak të detyrës”.
Si dhe N.K.28 vjeç, banues ne Lalm i Ri Lezhë, pasi ishte pasagjer në automjetin që drejtohej nga shtetasi E.N. dhe gjatë kontrollit fizik policia i gjeti këtij shtetasi në brez një armë zjarri tip pistoletë me pesë fishekë të cilën e mbante pa leje.
Materialet proceduriale i referohen Prokurorisë pranë Gjykatës Shkallës Parë Lezhë në ngarkim të shtetasit E.N., për veprën penale “Veprime në kundërshtim me vendimin e Gjykatës” dhe në ngarkim të shtetasit N.K.për veprën penale “Armëmbajtje pa leje”./ Opinion.al E.Xh.
