Fiks dy javë nga supergrabitja në Rinas, ku dyshohet se u morën 6.5 milionë euro, ngjarja vazhdon të jetë plot mister.
Si dështoi siguria në Aeroportin e Rinasit? Qeveria për këtë fajëson kompaninë koncesionare të sigurisë së aeroportit ICTS Albania, por shumë të tjerë, ekspertë të fushës drejtojnë gishtin nga autoritetet ligj-zbatuese. Deri tani kemi vetëm një paralajmërim nga ministrja e Infrastrukturës, Belinda Balluku për prishje të koncesionit me kinezët, ndërsa hetuesit kanë në dorë gjithë dokumentacionin se si është vepruar nga punonjës të ICTS Albania. A ka punonjës bashkëpunëtorë me grabitësit? Nga faktet e dala deri tani dyshimet janë të shumta! Por asnjë i arrestuar…
Si lëvizte lirshëm një person në kërkim si Admir Muarataj? Në kërkim që nga 2013, Admir Muarataj arriti mjaft mirë, jo vetëm t’i shpëtojë autoriteteve por edhe të bëjë goditje të bujshme. Sipas informacioneve ai për një kohë të gjatë ka jetuar në kryeqytet në zonën e Freskut, Yzberishtit, po ashtu dhe në Kamëz. Duke i shpëtuar syrit të SHISH apo dhe policisë, Muarataj arriti të organizonte disa herë grupin dhe të kryente grabitje që i ngjanin më shumë filmave aksion. E siç është raportuar duke bërë dhe ndërhyrje estetike Muarataj kishte dalë jashtë radarit të autoriteteve.
Sa euro u vodhën dhe a mbetën të tjera aty? Bankat kanë dhënë një shifër tjetër nga ajo që ka deklaruar ministri i Brendshëm. Për emisionin Opinion, tre bankat që ranë pre e grabitjes kanë thënë se shuma e marrë nga grabitësit është rreth 6.5 milionë euro. Ministri i Brendshëm, Sandër Lleshaj ka deklaruar nga ana tjetër se shuma e grabitur është 5.8 milionë euro. Por a u grabitën të gjitha thasët me para që ishin në barkun e avionit? Bankat për këtë nuk japin informacion, ndërsa prokuroria nuk ka në dorë asnjë kartëmonedhë pasi pas grabitjes avioni u ngrit në fluturim.
Admir Muarataj, u vra në shkëmbim zjarri apo e vranë shokët? Ekspertiza përfundimtare mjeko-ligjore nuk ka dalë ende. Për ministrin e Brendshëm, Sandër Lleshaj grabitësi u vra në shkëmbimin e zjarrit me policinë. Por menjëherë pas ngjarjes, ish-kryeministri Sali Berisha hodhi dyshime për versionin se, Admir Muarataj u vra nga policia. Më pas familjarët e tij kërkuan të dinin më shumë. Nga raportimet Muarataj ka një plagë me armë zjarri në anën e djathtë të kokës, plumbi nuk është gjetur, ndërsa flitet se goditja është bërë me një armë të kalibrit të madh ose nga një distancë e afërt.
A janë personat e arrestuar grabitësit e vërtetë? Katër persona u arrestuan në fundjavë, si të përfshirë në grabitjen e 9 Prillit. Informacioni i policisë ishte i cunguar në lidhje me rolin e tyre, por dyshohet se dy prej tyre kanë modifikuar furgonin me mbishkrimin “Hetimit Tatimor” që u fut në pistë. Furgoni dyshohet se u modifikua në një servis në zonën e Elbasanit. Të arrestuarit janë Alkond Bengasi 34 vjeç, Renaldo Sula, 25 vjeç Saimir Çela, 28 vjeç, të tre banues në Elbasan dhe 38-vjeçari Oltian Veseli, banues në Krujë. Ky i fundit (Oltian Veseli) sipas gazetarit Artan Hoxha ka marrë pjesë në luftime me talebanët në Afganistan dhe më pas është zënë nga marinsat amerikanë duke e depërtuar në Shqipëri. Ai njihet si “imami”.
Ku janë paratë? Hipoteza më e çuditshme është hedhur nga Ministri i Brendshëm. Sipas tij janë djegur! Pak kush mund ta besojë këtë version, ndërsa historia ka treguar se dhe në grabitjet e tjera autoritetet kanë gjetur vetëm nja 2-3 tenxhere me para të groposura. Në këto tenxhere ishin shuma të papërfillshme e sa për të tjerat atë e dinë vetëm “të zotët e punës”. Ndoshta dhe mund të jenë djegur, siç thotë ministri Lleshaj!/Opinion.al
