Policia ka bastisur një piceri në Gjermaninë perëndimore, e cila pretendon se u ka shërbyer klientëve kokainë kur ata porosisnin artikullin me numër 40 nga menuja.
Autoritetet u informuan për skemën në mars nga inspektorët e ushqimit dhe oficerët e skuadrës së drogës filluan të vëzhgonin restorantin.
Kur policia shkoi për të ndaluar menaxherin e picerisë në banesën e tij, 36-vjeçari thuhet se hodhi një qese me drogë nga dritarja, e cila “ra në duart e oficerëve të policisë”.
Policia gjeti 1.6 kg kokainë, 400 g kanabis dhe 268,000 € në para në apartament.
Menaxheri i restorantit u lirua nga policia disa ditë më vonë dhe ai rihapi restorantin e tij duke vazhduar të shiste kombinimin e drogës dhe picës.
Në këtë mënyrë hetuesit shfrytëzuan mundësinë për të eksploruar zinxhirin e furnizimit të drogës në piceri, duke i çuar ata të shkatërronin një rrjet droge në Gjermaninë perëndimore disa javë më vonë.
Rreth 150 oficerë bastisën dy plantacione kanabisi – një në Mönchengladbach, në perëndim të Düsseldorf ku u gjetën 300 bimë dhe një tjetër në Solingen, në lindje të qytetit, ku u gjetën 60 bimë.
Gjithashtu u bastisën edhe shtëpitë dhe bizneset e 12 të dyshuarve, duke rezultuar në arrestimin e tre personave, mes të cilëve një 22-vjeçar i dyshuar si kreu i operacionit të drogës.
Policia gjeti gjithashtu armë, para dhe orë të shtrenjta gjatë bastisjeve.
Policia nuk ka bërë të ditur emrat e të tjerëve të përfshirë në operacionin e drogës, as çmimin e kombinimit të picës dhe kokainës./Opinion.al
