Një polic është pezulluar nga detyra nga Agjencia e Mbikëqyrjes Policore. Bëhet fjalë për Nderim Canin, me detyrë Oficer i Patrullës së Përgjithshme në Komisariatin e Policisë Nr. 4, Tiranë.
Ai dyshohet se ka kryer veprat penale të “Kryerjes së veprimeve arbitrare” dhe “Kallëzimit të rremë”.
Efektivi ka shoqëruar pa arsye të ligjshme një person në komisariat dhe e ka dhunuar atë. Po ashtu ai për të manipuluar veprimet e tij ka kallzuar penalisht personin në fjalë për “Kundërshtim të punonjësit të policisë”.
“Ky punonjës policie, në mosrespektim të atributeve për shkak të funksionit organik, me datë 02.12.2022 ka kryer shoqërimin pa arsye të ligjshme të shtetasit Z. Z., të cilin gjatë kohës së qëndrimit në ambientet e Komisariatit, e ka goditur duke i shkaktuar dëmtime fizike. Gjithashtu, për të manipuluar veprimet e kryera prej tij, ky punonjës policie ka depozituar kallëzim penal ndaj këtij shtetasi për “Kundërshtim të punonjësit të policisë””, njoftoi AMP./Opinion.al
