Pas denoncimit në media të një punonjësi policie i cili shfaqet duke shpërdoruar detyrën, drejtori i Drejtorisë së Policisë së Durrësit ka pezulluar nga detyra oficerin e policisë së Shijakut, si edhe ka nisur hetimin ndaj tij.
Sipas uniformave blu, nënkomisari me iniciale E. Ç., ka shkelur pikën 1 të nenit 209 të Rregullores së Policisë së Shtetit, e cila thotë; “Nuk përmbush apo dështon në përmbushjen e detyrave dhe përgjegjësive të cilat kanë shkaktuar pasoja të rënda në kryerjen e detyrave”.
“Drejtori i Drejtorisë Vendore të Policisë Durrës, në zbatim të pikës 8 të nenit 222 të Rregullores së Policisë së Shtetit, ka pezulluar menjëherë nga detyra, punonjësin e Policisë Nënkomisar E. Ç., me detyrë oficer në Komisariatin e Policisë Shijak.
Gjithashtu, Drejtoria e Standardeve Profesionale në Drejtorinë e Përgjithshme të Policisë së Shtetit ka nisur hetimin disiplinor ndaj tij, për shkelje të pikës 1 të nenit 209 të Rregullores së Policisë së Shtetit “Nuk përmbush apo dështon në përmbushjen e detyrave dhe përgjegjësive të cilat kanë shkaktuar pasoja të rënda në kryerjen e detyrave””, njofton policia.
Ndërkohë, Agjencia e Mbikëqyrjes Policore ka nisur hetimin penal ndaj punonjësit të Policisë.
