Janë zbuluar të dhëna të reja lidhur me ngjarjen e ndodhur sot në Portin e Durrësit ku u bllokuan rreth 5 milion euro të fshehura në një automjet “Toyota Yaris”, që ishte ngarkuar në një kamion që transportonte 8 automjete të tjera. Deri më tani mësohet se kamioni me targa AA 120 SP është në pronësi të shtetasit Edi Lika. I cili posedon edhe dokumentacionin e mjetit.
Në portin e Durrësit kanë mbërritur krerët kryesorë të Policisë së Durrësit, ndërkohë drejtori dhe nëndrejtori i Drejtorisë së Policisë së Durrësit po ndjekin hetimet dhe procedurat hetimore, ashtu si edhe prokurori i çështjes Sokol Nishani.
Sinjalizimi për shumën marramendëse të parave thuhet se është marrë nga Interpol Italia, ndërkohë që deri më tani janë katër persona të shoqëruar dhe makina ishte nisur me traget nga porti i Ankonës.
Nuk mund të thuhet diçka e saktë lidhur me shumën e saktë të parave, por paratë kanë rezultuar të rregullta, jo të falsifikuara, ndërkohë që pritet të zbardhet pritësi kryesor i këtyre parave.
