Behgjet Pacolli, është një nga personazhet e përzgjedhura për vitin 2019 nga emisionin Opinion. Ministri i Jashtëm i Kosovës në detyrë ishte i pari që dhuroi plot 1 milion euro për situatën e krijuar në Shqipëri, pas tërmetit të 26 nëntorit. Në një intervistë për Opinion, ai tregoi si e mori vesh lajmin për tërmetin.
“Unë në datën 25 nëntor isha këtu në Shqipëri. Tërë ditën pothuajse e kalova dhe në mbrëmje udhëtova për në Kosovë. Në datën 26 është dridh toka, unë e kam ndjerë atë dhe jam ngrit prej gjumi por nuk kam pasur asnjë ide se kua ka qenë ajo. Kam dalë në ballkon menjëherë dhe më pas kam fjet. Të nesërmen unë e kuptova se çfarë ka ndodh dhe e përjetova shumë keq. Atë ditë isha nisur për në Zvicër, kështu që gjatë rrugës prej shtëpisë në aeroport dhe ne aeroplan unë nisa të lexoj lajmet. Dhe deri sa mbërrita në Zvicër e pash çfarë ka ndodhur. Vajza ime erdhi dhe me priti në aeroport dhe më tha: “Babi ka ndodhur një tragjedi e madhe në Shqipëri, thotë mendohet se ka me dhjetëra të vdekur dhe në shkollë pyetjen e parë që më kanë bë, sa do të kontribuoni ju dhe si do të kontribuoni?”, tregoi Behgjet Pacolli për Opinion.
“Unë e diskutoj me vajzën time, aty inkludohet dhe djali im i cili është 13-vjeçar dhe ata vendosën. Thonë ia fillojnë diku prej 10 mijë euro dhe vjen dalë ngadalë duke u diskutuar kjo shumë deri në 1 milion. Edhe vajza thotë edhe më shumë se kaq”, tha më tej Ministri i Jashtëm i Kosovës në detyrë.
Ai tregoi se nuk kishte dëshirë që emri i tij të dilte në publik për këtë kontribut, por e bindi vajza.
“Në datën 27 herët kam ardhur në Shqipëri me aeroplan dhe kam shkuar drejt në Thumanë. Aty ishte ajo ideja ime që të kontribojë. Ne kemi vendosur që të deklarojmë atë 1 milion. Unë kam menduar shumë që të mos deklarohet fare, të jepet në mënyrë anonime. Vajza ime më tha që unë duhet me e publiku, për arsye se unë duhet t’ju them shokëve dhe shoqeve”.
I pyetur për kompleksin e pallateve që do ndërtojë në Thumanë, pas tërmetit, ai deklaroi: “Projekti mbaroi me një shpejtësi marramendëse është planifiku dhe është konceptu që të jetë i adaptuar për zonën sizmike të kësaj grade. Cdo gjë nga ne është gati, bile-bile janë parapagua edhe materialet”./ Opinion.al
