Nga Reldar Dedaj
Greqia lëshoi një urdhër “internacional wanted” dhe i vuri nofkën “Escobari i Ballkanit”, shqiptarit Klement Balili. Ai është një 40-vjeçar i fortë, i rritur afër politikës, i pasur dhe me shije ashtu-ashtu, përderisa ka ndërtuar gjithë atë hotel në Sarandë dhe s’ta ka ënda të pish një kafe.
Punonjës i administratës së shtetit, mik i disa politikanëve më në zë në vend. Kur e shpallën trafikant droge, ai ishte drejtues në administratën shtetërore si drejtor i Transporteve në Bashkinë e Sarandës.
Sot, të gjithë po e kërkojnë, policia që ka për detyrë ta kapë, duket se është lodhur dhe nuk po e gjen dot. Mirëpo ai ndodhej në Sarandë, ditë për ditë e natë për natë, dasma e morte. Gazetarët mund ta fotografonin kudo. Greqia e kërkonte kudo. Por, Klementi i bënte pushimet në bregdetin e Sarandës dhe priste e përcillte miq në hotelin e vet…
Të lodhur nga “cic-mi-cet” e politikës dhe të policisë, të gjithë pyesin: Pse nuk e kapin Klement Balilin? Gazetari investigativ, Artan Hoxha, në studion e emisionit “Opinion” në TV Klan, 48 orë para se të shkruheshin këto radhë, deklaroi se Klement Balili ka udhëtuar në Dubai, bashkë me një ministër të kësaj qeverie. Gazetari, më tej, nënvizoi se udhëtimi është kryer në kohën kur ai ende nuk ishte shpallur person në kërkim ndërkombëtar.
Problemi nuk është të dihet se kush ka qenë ministri që ka udhëtuar drejt Dubait me Balilin, nëse ka udhëtuar, ajo dihet, problemi qëndron se kush është ai që e mbron kaq shumë Balilin e Delvinës?
…sot të gjithë po kërkojnë atë. Disa ditë më parë, pikërisht në zyrën e kryeministrit, u mblodh edhe shefi i SHISH, edhe ambasdori i SHBA-së. Donald Lu, pas atij takimi, u detyrua edhe njëherë tjetër të pyesë shqip: ku është Balili?
Nga ajo ditë, mediat gjurmojnë Balilin. Disa shkruanin se është në Sarandë, disa të tjera është në Tiranë. A kanë hyrë ato në spekulime? Kjo është pyetja.
Sepse në një këndvështrim të përgjithshëm, duket se i gjithë shteti shqiptar, institucionet më të rëndësishme të tij, fqinjët dhe trupi diplomatik në vend, janë të shqetësuar për vendodhjen e tij. Por askush se sheh, në fakt, e shohin vetëm kamerat e aparateve celular privat, por jo institucionet, jo ata që duhet ta kapin, veç ata jo.
Larg qoftë, por duhet thënë, mos po bëjnë autoritetet shqiptare se duan të dorëzojnë Balilin, por në fakt akoma nuk janë të sigurtë që t’a dorëzojn?
Një pyetje tjetër, mos është edhe kjo, çfarë e mban në lojë aq shumë atë, madje edhe për ballë faktit që ai të dorëzohet si “trofe” i ndershmërisë politike?
Por siç duket, fuqia e internetit, i ka nxjerrë cullak autoritetet shqiptare. Të paktën ata nuk mund të thonë ne nuk e dinim. Me Klement Balilin jemi duke parë rikthimin e historisë së një bosi mafie, Al Capone, p.sh, por me një ndryshim. Këtë herë historinë e tij nuk na e bëjnë me dije mediat, por vetë ai. Nga një aparat celuar, nga një dasmë, nga një motoskaf dhe tek shëtit krejt i lirshëm në plazhin e detit Jon.
Se nga e kërkojnë këta të tjerët, këtë punë, veç një Zot e di….
