Në një shkrim të dy ditëve me pare të Huffington Post, analisti Fron Nahzi, i dedikon një kolonë të veçantë çështjeve të drejtësisë, në Shqipëri nxitur edhe nga deklaratat e ashpra të Ambasadorit amerikan Donald Lu.
Nahzi, i cili ka qenë drejtori i parë i Fondacionit Sorros në Shqipëri dhe gëzon një përvojë më shumë se 20-vjeçare në menaxhim, konsultim apo analiza mbi çështje ndërkombëtare dhe veçanërisht të Ballkanit, në shkrimin e tij përmend Berishën dhe Metën, si emra të njohur të politikës, që sipas tij, janë të fajësuar nga shqiptarët për çështje të korrupsionit.
“Një lider i korruptuar është një kundërshtar fantastik; një lider i korruptuar, por i mbështetur nga fuqitë perëndimore, është një Goliath.
Shqiptarët drejtojnë gishtin nga Sali Berisha, i cili prej shumë vitesh ishte djali i preferuar i SHBA dhe Europës.
Po ashtu ata drejtojnë gishtin tek Ilir Meta, kryetari i Kuvendit dhe kreu i LSI, partner në qeverisje i PS, i cili kur ishte në koalicion me Berishën, u kap në video duke kërkuar ryshfet”. Kështu shkruan Nahzi në artikullin e tij, ndërsa mban një qëndrim krejt tjetër për Kryeministrin Rama:
“Ndryshe nga dy paraardhësit e tij, që kishin detyrën e pamundur që të punonin me një kryeministër kokëfortë si Sali Berisha, Lu ka gjetur një partner të gatshëm tek kryeministri Edi Rama”.
Kështu shkruan Nahzi në artikullin e tij, të cilin e mbyll me fjalinë:
“Nëse politika amerikane ia del të transformojë gjyqësorin shqiptar, shqiptarët mund të cicërojnë: “Ambasador Lu, të kemi pritur prej 25 vitesh”.
Ndërkohë në rrjetet dhe media, ka nisur të qarkullojë një foto e Kryeministrit Rama me Fron Nahzin, që ka çuar në idenë se të dy janë miq të hershëm, duke aluduar se ky qëndrim i Nahzit ndaj Ramës ka një arsye përtej realitetit.
